和居酒屋 (已結業)

估唔到喺太子花園街搵到間幾正嘅日本餐廳，環境舒適幽靜，嘢食又好食！晚市套餐好抵食。天婦羅稻庭烏冬餐$128有味噌湯同埋刺身一客。 烏冬係優質嘅稻庭烏冬，爽滑彈牙，湯底亦夠清甜。 天婦羅有六件，其中兩件係蝦天婦羅，其他都係啲蔬菜，炸漿唔會太厚，熱辣辣。最估唔到餐嘅刺身係三大件三文魚，厚切，鮮味，遠超預期。四色魚生丼餐$138包味增湯同埋小食，小食係脆脆有嚼勁嘅炸雞軟骨，份量唔少。魚生丼又係估唔到咁大份，全部刺身都大大件厚切嘅，仲有一件甜蛋添。 刺身新鮮無雪味，好優質。 最正係個帶子同牡丹蝦，綿滑有質感。黑豚五花腩油脂豐富夠香口。豚肉蘋果呢款串燒第一次食，配搭新穎又簡單！手羽係我必點嘅串燒。鹽燒三文魚水撥好肥美，啖啖魚油香味。麵豉免治雞肉最出色，用左紫蘇葉去包裹，好清新！最後焦糖燒菠蘿做甜品，正！比預期中出色，唔少菜色都有驚喜。