Fûhn (The L. Square) (已結業)

記得剛開業嘅時候已經試過呢一間越南菜，當時食物質素一般，而且記得炸物炸得比較燶，心諗應該係剛剛開業，所以質素偏差過咗一排，今日突然想食下越南粉就再嚟試下，點知食物質素大大進步值得讚許。呢度嘅粉麵係分唔同size嘅，我哋叫咗L size嘅生牛肉牛柏葉金邊粉，碗粉大大碗足夠兩個人食，一定夠飽。 生牛肉剛剛好，有牛肉味，幾好食，牛柏葉亦都爽口湯底夠味。另外，仲有啲牙菜、青檸等配菜等你加入去碗粉度。我哋另外仲加咗個小食拼盤，小食拼盤有兩塊蝦餅、四條越南春卷、同埋兩隻蒜蓉牛油雞翼。食物新鮮整，炸得卜卜脆。春捲炸得唔錯，一啲都唔硬，幾好食而且蝦餅蝦肉彈牙又夠脆，我最鍾意食蝦餅蒜蓉牛油雞翼就略嫌個炸粉皮厚咗啲，但係蒜蓉牛油味香濃。不過我就反而覺得炸物就偏多油，如果能夠隔一隔油就好啲啦! 清清地，我哋仲嗌咗個扎肉紙米卷，扎肉紙米卷包到脹卜卜，好足料 不過有少少包得散。食落去咬落爽口，配菜又夠味，又帶薄荷葉香。味道唔錯。銅鑼灣區越南菜嚟講，價錢唔貴，兩個人都係食咗二百零蚊左右，性價比高