Just Eat (已結業)

正宗越南菜小店Just Eat 坐落喺西半山，有啲隱蔽，嗰日同朋友行完山去左食尼間，都幾好食。芒果軟殼蟹米紙卷啲芒果酸酸甜甜幾好食，冇乜絲咁，包住佢嘅米紙卷都幾薄，唔會好厚咁。而個軟殼蟹係暖，同好脆口，個粉唔會好厚，真材實料，值得試。咖哩脆皮牛腩好得意嘅菜式，所以就試下，我覺得有啲普通。個脆皮雖然好薄，但係好離舊牛腩。牛腩幾肥美，有肥有瘦，同肉味都濃，同燘得好腍。而個咖哩汁都幾好食，都幾有層次，唔算好辣，配牛腩好正。我地再加左個蒜蓉包，我覺得好好食，因為佢係將個包切左啲坑紋，而入面都有蒜蓉，上之前有翻熱先，所以好好食，外脆內軟咁，好正。馬拉盞炒芥蘭好香口，比出面嘅辣，馬拉盞嘅份量都多，啲菜唔會太腍，好好食，不過唔建議唔食辣嘅人試。蜜桃香茅茶尼個有啲失望，因為冇乜香茅味，得桃味，同偏甜，唔係清新嘅東南亞飲品feel。越南啤酒我個朋友好鍾意飲酒，難得有越南啤酒就梗係試啦，佢話幾香，唔會好乾咁。佢試左兩款，話綠色就清啲，覺得紅色好飲啲。以前喺附近翻學，覺得冇乜嘢食，幾年後多左唔少選擇，我覺得尼間好啱學生同附近居民食，又抵又好食。