嘉寶漢堡 (已搬遷) 新店位置

老實講，各式各樣嘅漢堡包都有食過，要稱得上好食嘅喺我心目中就無咩邊間～呢排呢間嘉堡漢堡好似好hit咁，最鐘意湊熱鬧嘅我又去幫襯下先！佢地嘅漢堡包好似細個玩電腦遊戲嗰啲咁，做到好似假咁靚啊～（尤其係塊生菜，又綠又大塊真係好少見）每層都好厚好大舊，每啖都要擘大個口先食到！層次豐富，洋蔥嘅香味令食個包加分不少！雞扒非常juicy，再加埋佢地嘅祕制醬汁，一路食一路滴，好味到唔識形容！另外加左薯格，多到裝滿哂個紙袋，點埋茄汁食好滿足啊！個人認為，要判斷間店好唔好食，一定要點佢地最普通嘅食物。呢款芝士牛堡非常出色！洋蔥同煙肉都煎到非常香，生菜夠甜夠新鮮，溶左嘅芝士再配埋好有牛味嘅牛肉⋯⋯好似廢話，但真係好好食呢！值得讚嘅係佢地嘅牛唔會煎到乾哂，肉汁無停過咁流出嚟，雖然食到好狼狽，但係因為咁好味至食得咁開心！呢間漢堡已列入我最喜愛餐廳之一，值得一試啊！！！