湯煲私房火鍋 (已結業)

間唔時會對用花膠雞湯打邊爐心癮起，講真唔係成日都好食，但有得揀已經好耐冇揀過沙嗲之類嘅頹湯底。 今晚有意外之喜，難得煲湯料靚到好似額外賺咗兩款邊爐料咁，點醬汁食得好開心。打邊爐當然最重要係靚牛，兩個人叫碟例牌手切騸牯牛已經好夠食。 厚薄同大細都切得啱啱好，牛味鮮甜，如果淨係為咗碟牛都值得再嚟。自家製墨魚丸同蝦丸超級爽口彈牙，蝦丸咬咗一啖嘅感受係彈到上太空，同時好足料食到粒粒墨魚同蝦肉。川色麻辣牛肉餃同味增大根黑豚餃皮薄餡靚，後者尤其有驚喜，估唔到同小籠包一樣咁爆汁，白味噌同豬肉好香甜，唔洗再點醬都好完美。即炸響鈴就係自信到店員叫我哋直接點甜酸汁即食，一咬就感受到十幾層鬆化透薄嘅脆皮，乾爽香脆。 始終習慣浸幾秒湯，比起一般食開嘅響鈴冇咁重油味，更加品嚐到鮮甜嘅湯底。