Running 燒 (已結業)

今次黎左食任食嘅韓燒！重點係仲有好多海鮮食，正！講左海鮮先啦！重點推薦嘅海鮮係帶子！帶子大大粒，都算厚肉。食落爽口彈牙，而且仲好新鮮。不過燒個陣要好好控制火候，唔好燒得太老，如果唔係就浪費左啦！扇貝都唔錯，我地加左蒜蓉同鼓油上去燒，就變左蒜蓉燒扇貝！不過比較推薦帶子，因為快熟！其他海鮮仲有生蠔，龍俐柳，魷魚圈。生蠔就比較細，唔算厚肉，但都食到海水味。龍俐柳都唔錯，魷魚圈就好彈牙！至於肉方面。個人最推薦嘅就係羊西冷！食羊嘅朋友一定要試下！肉質好滑嫩，燒完仲有肉汁，香羊肉味但唔會過份地騷！encore 左好多次都好食，正！辣味五花腩都好食，包上生菜食真係好有韓式風味。至於熟食方面，叫左炸雞，水冷面，炒粉絲，全部都頗有水準！最好食係水冷面！好清新好開胃好解膩！好似韓劇咁食完咁多燒肉，再食水冷面！真係好正！食完覺得好濟嘅朋友記得試下水冷面啊！但炸雞個炸漿就略嫌厚左。