大壹燒鵝 (啟田大廈)

營業中

休息中

前兩日下晝嚟買外賣燒味，除咗燒鵝，諗住想試吓佢嘅燒腩仔，點知賣晒，不過燒鵝和叉燒味道真係唔錯，所以今日再嚟，今次堂食，枱面上只有午市套餐，再問侍應原來有full menu，兩個人叫咗兩個午市燒味雙拼套餐，可以分享試齊四種燒味，一個米粉一個瀨粉，再加個小炒王和薑蔥蠔，一杯熱奶茶，一杯凍檸茶。先來飲品，凍檸茶好多片檸檬，茶色深有茶味，奶茶都唔錯，跟住嘅燒味，份量OK，燒腩仔真係唔錯，皮脆肉滑，貴妃雞都好味，肉質鮮嫩，皮薄唔多油，叉燒有少少燶邊，燒得幾好，肉質都唔錯，不過覺得太多蜜糖甜咗啲，燒鵝皮薄肉厚，感覺到好多種唔同嘅醃料，，不過四舊有兩舊都係皮包骨，旁邊加咗啲榨菜，幾開胃，兩碗粉都好大碗，質地都好好，之後嚟嘅小炒王，好大碟，好足料，不過食落似小炸王多啲，裏面好多材料都係炸，好油，材料真係好豐富，反而想佢多啲韭菜花，魚乾蝦乾實在真係太多，最後食唔晒覺得有少少嘥，最後嘅薑蔥蠔，成煲滾熱辣放上枱，大概有六七隻，蔥夠多，不過薑就少咗啲，食咗第一隻，發覺好大浸臭味，相信啲蠔係急凍，雪咗好耐，兼處理得唔好⋯⋯所以之後成煲冇郁過，侍應嚟到見到，就同佢反映，都諗住照埋單，點知個侍應話不如買過另外一樣嘢