新東記火鍋店 (已搬遷) 新店位置

以前係尖沙咀返工，成班同事最鐘意放工去新東記打邊爐，但無係尖沙咀返工後，就好少去，今日舊同事約食飯，地點依舊新東記。先叫秘制沙嗲湯底，鐘意佢好香好濃，又香花生味，必叫。手切肥牛肉叫咗中肥例牌，滾一滾已經食得，入口好嫩，牛味又濃，少少肥肥地，更加香，又唔韌。脆肉鯇魚腩，肉質好脆好新鮮，但係好多骨，要小心食。自家製墨魚膠，好彈牙爽口，鮮味十足，而且都好大份，抵食。桂花蚌，吸咗沙嗲湯底嘅貴花蚌，除咗口感好爽彈，仲更加滋味。鵝腸，唔算好肥，不過味道都ok。鮮冬菇，放落湯底等佢慢慢滾，吸曬沙嗲湯底嘅鮮菇特別好食。茼蒿菜，朋友最愛嘅打邊爐蔬菜，青綠鮮甜。雖然好耐無離，但裝修都無變，食物依舊好味，完全係以前食開嘅感覺，打邊爐始終覺得老牌火鍋特別正。