旺角呢間小店主打手造意粉及薄餅，食材大多都用上日本貨，真係食得出相當有水準，而且價錢親民免加一，回頭率好高，今餐2人食都係人均$150
「忌廉汁醃肉、日本生雞蛋配手作闊麵」係呢間餐廳必食，日本麵粉手作麵條煙韌彈牙帶蛋香，忌廉汁拌上日本生雞蛋撈勻麵條，食落更濃郁滑更香滑，仲有自家鹹香醃肉，呢個價錢食到咁質數性價比相當高
手作薄餅「醃肉、蕃茄片、車打芝士、乾辣椒碎」餅底用上冷發，所以批邊香脆中間軟熟，有拉絲效果，微微香辣好惹味
「焦糖脆脆脆蛋糕」係呢到招牌人氣甜品，質素好似喺日本食蛋糕咁，海綿蛋糕濕潤鬆軟，外層忌廉係冇糖，但食到奶滑嘅香甜，而焦糖脆脆係自家製，甜度剛好夠脆不癡牙（當零食都可以😌）
「烤焗芝士雞塊」即叫即焗，外層日本麵包糠香口，入面雞肉超嫩滑多汁，仲有啖啖巴馬臣芝士味，好食喔👍
自家製「水果茶」及「冷泡玄米茶」，前者清甜後者充滿玄米香，冰涼夠解渴，夏天飲好舒服，跟餐免費配送
