梨滿園韓國料理 (已結業)

同一班朋友來旺角食飯，有朋友提議食韓國菜，於是就上左來呢間梨滿園韓國料理，我地叫左個六人餐。呢度嘅配菜幾多款，而且幾好食，尤其泡菜、蘿蔔同薯仔絲，而且食完仲可以叫佢添比你。韓式秘制豬手整個豬手都切好曬一塊塊，食起來好方便。豬手肥瘦適中，肉都好軟腍，味道有D似滷水味，幾好食。韓燒拼盤拼盤有五花腩、雞、牛肉、牛舌等等。侍應姐姐好細心咁幫我地將D五花腩再剪細塊先擺落去去燒。每件肉都醃得好入味，燒完食起來都好juicy。韓式牛肉八爪魚鍋呢個鍋好大煲，材料好豐富，除左牛肉同八爪魚外，仲有金菇、年糕、豆腐等。八爪魚好彈牙爽口，牛肉都幾好味。一開始試時覺得個湯底無想像中咁辣，後來當個湯滾起嘅時候會濃味左少少，但整體唔算好辣。侍應姐姐主動過來幫我地將d八爪魚剪細。呢個六人餐仲每人包一碗白飯同一罐汽水，整個餐份量都幾夠，食完都好飽肚，而且味道唔錯！