街坊Cafe (已結業)

自從西洋菜南街冇咁嘈之後, 最近都行多左旺角呢邊買下野同食下野。今次收工就約左老婆仔去通菜街果頭行下順便食下野，果度周不時會搵到好食性價比唔錯既餐廳。今次去到呢間餐廳門口第一樣吸引到我係D 焗蠔同二人餐，估唔到食到勁飽。入到去坐底, 就立即叫左呢個日本熊本霜降牛西冷二人餐, 個價錢包括左西湯、沙律頭盤、主菜、甜品同飲品，好標準既二人餐。由於聞到隔離檯黑松露味已經流口水, 我地兩個都加$28叫左個黑松露忌廉湯。然後其中一個主菜係熊本霜降西冷扒，另一個主菜係香草海鮮意大利粉。另外杯飲品都幾特別，佢地都改晒D香港經典歌名，80後既小弟都覺得非常之有親切感!值得一提既係佢地上菜速度都好快唔洗等之外，呢度每一樣野食都大大份，成個餐食到中間已經見7分飽, 如果係女仔多應該可以3-4個人食呢個超抵巨餐。最後甜品就叫左個TIRAMISU，份量又係大大份，老婆都開啟左第二個胃。