Sky726

前排有朋友生日，想帶佢去一間有靚景嘅餐廳食生日飯，搵嚟搵去旺角都好少啲類型嘅餐廳，結果嚟咗呢度，有落地大玻璃靚景之餘，食物質素都唔錯。因為我哋係下晝兩三點先嚟，所以餐廳唔算好多人。餐廳裝修都幾別緻，有bar枱位，亦有窗邊位。好好彩我哋今次可以坐到落地大玻璃隔離，望到成個西九龍，夜晚嚟嘅話仲靚。我哋首先叫咗個田園沙律，個沙律份量大到嚇親，有勁多麵包糠，正啊！同埋我幾鍾意佢個橄欖汁，食到好開胃！我哋加$48變做套餐，送多個細沙律、餐湯同埋餐包，幾鍾意嗰餐湯，因為有勁多料。再叫咗個墨西哥燒粟米做小食，上面有啲好似孜然粉嘅調味，好出色！主菜就叫咗半隻香草燒春雞，隻雞燒得幾嫩滑，仲配左唔少嘅薯條，食到呢度已經好飽。結果今餐兩個人埋單都只係大概$450，可以望到呢個景，真係好抵食。下次有機會都上嚟呢度睇吓夜景，仲可以飲番幾杯酒，諗起都好chill。