味道樂居酒屋 (元州街) (已結業)

去日本旅行，喺街一定會見到好多居酒屋，估唔到喺長沙灣都會搵到一個咁有日本風味嘅居酒屋。認識呢間餐廳，係喺雜誌見到宣傳好出名嘅鰻魚飯。由於今日去醫院探屋企人，而呢間餐廳又喺附近，所以晚餐黎試一試。端午節前一日嘅晚上，等咗大概15分鐘就入座，餐廳唔算好大，對比起日本嘅居酒屋，比較光猛。先來一個黑松露帆立貝沙律，我唔太中意黑松露嗰陣味，同沙律好似唔太夾，值得一讚係有啲番薯仔好甜，帆立貝尚算新鮮。三文魚刺身肥美，鮮甜。鰻魚飯真係好大份，但略嫌鰻魚燒得太乾，令到肉裏面冇乜水份，但個皮都係脆既。最尾叫左一個蟹膏帶子卷物，係朋友揀既，我會中意蟹膏捲住係入面多啲。其實長沙灣真係冇乜居酒屋，所以多一個選擇都係好嘅，餐廳質素屬於中中，住喺附近可以一試，但距離地鐵站比較遠，要步行7分鐘。