麵屋一平安 (已結業)

次次行過呢度都見到坐滿人，難得有次行過見門口幾張枱都冇人，於是入咗去坐低食碗麵。門口帶位個阿姐同好多個侍應都一副日本妹/姑樣，搞到叫嘢食嗰陣我都唔知講唔講廣東話好。間嘢裝修好簡單，最搞笑有對古谷實畫嗰啲樣嘅男女走入嚟，週圍打量吓間舖，跟住個男嘅話：「咁架咋喎。」個女嘅冷傲咁縮一縮膊，跟住兩個就走咗去。我心諗：「吓，你哋祈望間舖係點呀? 有碌鋼通喺枱上面啲侍應會忽然跳上去攬住碌柱轉圈呀?」幫襯嘅好多都係日本上班族。靜靜哋，食都食得舒服啲。去親食拉麵我都係叫最簡單嗰啲，今次都係叫熊本豬骨拉麵。個湯好濃，拍得住sanpachi，不過冇咁油。啲麵唔係咁好咬口，唔及yokozuna。啲位其實麻麻哋好坐，因為啲櫈都幾矮。