漁火海鮮刺身火鍋

營業中

休息中

臨喺冬天完結前食埋最後一轉打邊爐！依加打邊爐有得揀都想揀返啲高質素少少，啲料靚少少嘅，好過一味任食但唔知食咗啲咩。難得今日出來銅鑼灣，係openrice搵到呢間銅鑼灣區排名算高嘅火鍋，又的確唔錯。湯底揀咗胡椒豬肚湯，湯底真材實料，豬肚好多，胡椒好濃淨係飲湯都好暖身。清遠雞件好新鮮，係真係有雞味，滾完後件雞唔會好似冰鮮雞咁白雪雪，係真係有血流過，而且好彈牙，煲耐少少都唔會老。你個人必叫火鍋配料list入面嘅凍豆腐，呢度做得相當好！睇都睇得到入面好綿密，鎖曬啲湯但完全唔會煲到散晒。肥水大花甲隻隻好似拳頭咁大隻，烚幾分鐘就食得，好清甜唔起筋都唔霉，好新鮮。手打蝦丸真係粒粒都有蝦，仲要每粒有幾隻蝦，真啲都唔姑寒。即使係響鈴同白菜仔咁普通嘅嘢都真係好食，響鈴一啲油益味都無，而且好香嘅腐竹味，就好似食緊固體嘅豆漿咁。白菜仔好爽脆，棵棵都大大棵又翠綠。最後order一壺竹蔗茅根清下熱氣又解渴，成餐飯都好perfect。埋單五百幾蚊兩個人，八點三前埋單仲有九折，同任食差唔多，但食到新鮮材料真係好抵食。