有蒸氣 海鮮石鍋專門店 (已結業)

之前翻工忙食左幾日頹飯，難得做完野又出左糧想獎勵一下自己，就揀左呢間蒸氣鍋餐廳食晚飯。餐廳入面嘅火鍋套餐有好幾款揀，因為我地唔食牛，所以揀左翡翠海中寶套餐。今次蒸氣鍋嘅食法係上面蒸海鮮，下面煲住冬瓜盅，等啲海鮮汁滴哂落個湯道，所以連冬瓜盅都有鮮味。仲有個時間掣顯示住要蒸幾耐，咁就唔會蒸多左。套餐入面野食都幾多，一半以上係海鮮，全程有店員幫手落料蒸，好貼心。蟲草花+鮑魚好新鮮！鮑魚咬落唔靭，幾彈牙，咩都唔點就咁食就最好食。蝦+蜆蜆冇沙係抵讚嘅，平時屋企煮蜆煮極都有沙，今次原隻食都冇事，幾鮮甜。蒜蓉扇貝本來餐廳幫我地準備左扇貝，但店員覺得扇貝未夠新鮮，特登幫我地換左兩隻新鮮扇貝，服務超好！所以今次食嘅扇貝新鮮冇腥味，好好食。蒸蟹蟹肉鮮，蟹膏幾香。黑松露蛋蛋蒸得幾滑，望住店員先蒸蛋再一齊蒸黑松露，黑松露味幾出。冬瓜盅今晚重頭戲係冬瓜盅，食完海鮮，食冬瓜盅解解膩幾舒服。啲湯吸收哂海鮮啲精華，夠濃味。後加左四寶丸同菜。蝦丸食得出係人手打，夠彈牙。蒸海鮮都有先後順序，蒸蛋耐時間，先煮蟹再蒸蛋，就可以食海鮮無縫接軌。呢間餐廳卡位私隱度幾高，枱都大張，適合同朋友一齊食，坐得幾舒服。