漁獲浜燒 (已結業)

餐廳嘅用餐環境唔逼夾，張枱都幾大，方便大家放比較多嘅嘢食，另外，我今晚就揀咗杯烏龍茶割燒酎 (即 Oolong Highball)，因為我唔太鍾意啲甜嘅飲品，呢一杯真係啱晒我 ; 正式開始之前，食返個前菜芝麻醬沙律先

第一款食物已經唔簡單，佢係帆立貝刺身！大家真係千祈唔好以平時成日食日式放題嘅質素同佢比較，因為根本完全冇得比，亦係完全兩回事

1 瀏覽

首先賣相已經贏晒，有好靚嘅擺盤，厚切又新鮮嘅帆立貝，用多樣配料作襯托，視覺已經滿足晒線先，而每件帆立貝上面，更有幾粒晶凝通透，又鮮甜嘅三文魚子，連同帆立貝一齊食，真係冇得頂

帆立貝新鮮爽口，食落非常有口感，而且帶有一點黏感，證明帆立貝確係非常新鮮，並無經過長時間嘅急凍冷藏，確實值得一讚

4 瀏覽

好多朋友都喜歡食得健康，食日式野嘅時候，都會叫沙律，呢個沙律係我推介嘅，佢係特製黑松露炙燒平木魚邊沙律除咗新鮮爽口，富有大量健康魚油嘅平木魚邊之外，當中更有新鮮嘅牛油果，令成個沙律更加健康

而將沙律中間嘅黑松露醬攪拌，佢嘅味道更加強烈，非常吸引，係一個健康，又非常好味嘅沙律

3 瀏覽

嚟到呢啲日式居酒屋，點都要試一試佢嘅刺身嘅，果然冇後悔叫到呢三款刺身，當中包括原隻牡丹蝦，活象拔蚌刺身及三文魚刺身，一句講晒，三款都非常新鮮，象拔蚌非常爽口彈牙，三文魚厚切，真係好味到唔知講咩好

本人作為刺身蝦控，點樣唔特別介紹呢隻原隻牡丹蝦俾大家先，大家可以睇到上圖，隻牡丹蝦仲長過部電話，咁樣冇經過超級急凍冷藏嘅佢，食落口感一流，有新鮮嘅蝦味，口感有張力，當你啜個蝦頭嗰陣，更加係鮮甜無比，呢隻蝦嘅性價比真係高到不得了

食完啲生嘅，就食下啲熟㗎啦，呢度都有磯燒既食法，餐廳會有店員將新鮮嘅海鮮，係你面前燒熟，今晚我同朋友決定食好啲啲，分別叫咗兩隻龍蝦，一隻係日本既伊勢海老，令一隻就係波士頓龍蝦

最衰呢度冇得放影片，如果唔係真係可以大家睇到，呢兩隻龍蝦上枱嘅時候，真係仲識郁㗎！真係極度新鮮，冇花冇假！

嘩！真係唔多機會可以睇住隻龍蝦燒到變色，感覺係有啲興奮嘅，兩隻龍蝦都有唔同嘅煮法，例如上圖嘅呢一隻，我哋就將佢斬件，用普通磯燒嘅形式去煮，食龍蝦嘅鮮味，就算唔落任何調味及醬汁，確實因為龍蝦非常新鮮，所以味道都已經非常好食

將龍蝦燒到金黃色，係咪真係睇到都好想食先！

1 瀏覽

燒海鮮都係今餐其中一個重頭戲，呢一盤海鮮，唔使講，同樣非常新鮮，佢係特上漁獲浜燒燒盛合 (4人前)，價錢係 $1,628hkd，點解呢個我要特別講埋佢價錢出嚟，最主要係因為，佢絕對值呢個價錢之外，係可以比大家衡量到，呢個價錢同佢嘅質素都係成正比嘅

當中包括大蜆，大蝦，鮑魚，大帆立貝等等

大家一睇佢嘅色澤就知，其實真係每款海鮮都好新鮮，一路係你面前笑嘅時候，其實真係已經流晒口水，根本都唔需要多講佢究竟有幾正！

燒起食落口既嗰份新鮮嘅味道，帶有少許海水味，海鮮爽口彈牙冇異味，真係會令你明白到點解佢會值呢個價錢之餘，絕對會令你非常滿足