和牛燒肉一郎 (寶漢大廈) (已結業)

疫情關係，都唔知幾時可以開關去日本😭。變左香港多左唔同國家既美食店開張或擴展，今次就黎試下呢間燒肉店。我地簡左B套餐$398，一開頭唔駛點野食，會送艘船俾你先，裡面已經有牛、豬、雞、海鮮同蔬菜。佢枱面仲有玫瑰鹽同黑椒俾你調味，不過佢本身d肉類都有做輕微調味，所以我都冇點落到同埋可以食到肉本身既鮮味。佢主打牛既燒肉，佢既牛食落都好高質，有d會入口鬆軟既感覺。同埋每次落單，你叫1份佢都會俾幾片你，數量唔會孤寒。佢有兩款牛舌簡，薄切及2色蔥花牛舌。我覺得蔥花牛舌較出色，以蔥花及洋蔥鋪係牛舌面，燒完之後，有濃濃既蔥花香味。店員間唔中會問你駛唔駛幫你換鐵網。除左肉類，都有幾多熱食或冷盤提供。我地叫左炸蠔同薯條，薯條配埋黑松露蛋黃醬，個醬有d驚喜，係濃濃既黑松露味，好食。薯條同炸蠔都炸得岩岩好，而且唔會有好重既油溢味。出面飲品吧有汽水或特色調製飲品。甜品吧都很出色，有日本品牌雪糕雪條、Mousse及布甸等。仲有沙律吧俾你解下食得多肉既罪惡感。