十和田 (已結業)

好掛住日本啲嘢食，雖然宜家去唔到日本，但喺香港搵間日本餐廳回味下都好。檯面有綠茶粉提供，味道都幾香。先點咗一份三文魚三味壽司同一件甜蝦壽司。一份有兩件三文魚壽司，一件上面配上薑蓉，而另一件就配上山葵。刺身厚切仲長過底下嘅飯，肉質鮮嫩好鮮甜。剩底嗰件係火炙三文魚，魚肉燒得唔會太熟，食落多咗一陣油香味唔錯。甜蝦壽司嘅蝦肉有手指尾咁長，口感軟綿，甜味豐富，好好食。海鰻卷一份有六件，鰻魚肉入口鬆化，咬落無骨，清得好乾淨。中間有青瓜同埋玉子做餡料。三文魚親子丼好有份量，上層嘅三文魚切粒鋪滿成個碗，魚肉切得都幾大粒啖啖肉好正。三文魚籽晶瑩剔透，喺口中爆開散發出陣陣魚油味。底下嘅飯都係同壽司一樣用赤醋米飯，味道更加香濃。