四季文昌 (已結業)

經過哩度好多次了，今次我同朋友提議不如試下，第一次食四季文昌。一行入來，原來裝修勁靚，好似文青咖啡館咁，點都諗唔到食雞火鍋。香蔥五花腩籠仔蒸飯（$62）好食又好睇，首先份量真係好大，其實可以兩個女仔分。一打開熱辣辣又香，D五花腩唔會好油膩，配埋香葱食都幾好。個飯係炒飯底，唔會乾，反而係沾左猪肉既油，好味，亦都好飽。四季文昌海南雞飯（$68）朋友點左哩個，應該係招牌菜，但其實一般。雞都算滑都小肥，個油飯就麻麻地，好乾身，無咩味。海南雞飯既靈魂就係個汁，佢三個汁好似係有d名堂，海南鼓油、爆蒜葱油、海南酸汁，三個汁比較好味既係左邊果個了。我比較鐘意點既薑油同甜鼓油就無了。椰子雞湯米線（$68）我試左個湯一啖，係清甜既，應該係有椰青水煮，但感覺有溝水既。朋友食食下覺得淡味，要左d辣醬來加味。菠蘿梳打餐配既飲品，大大杯。對住出面繁忙既街景，歎啖冰凍梳打，有種抽離既感覺，觀察世界，明明是身邊的事物，又好像同自己無關咁。整體來講，以太子既lunch來講，又好景，價錢是正常價，裝修好靚，明顯是想走文青風。我點既餐就好滿意，朋友就覺得佢地既一般。坐得好舒服就係真既。