岩鹽日本料理 (利舞臺廣場) (已結業)

weekday放工約咗朋友過嚟唔知食咩好，見到呢一間岩鹽覺得ok就入咗嚟試下。帶位姐姐好好人，好有笑容，好彩今次安排到卡位，環境舒適，光暗適中。首先點咗八爪魚意大利風沙律，賣相幾好，食落去味道新鮮，總共有六塊，好薄食落去有口感。和風牛肉釜飯呢一個係定食，有沙律、配菜同埋刺身，仲配埋麵豉湯。和風牛肉煮得啱啱好，唔會太老，仲加埋啲飯焦，感覺一流。如果冬天食就更加正。合鴨大蔥串燒，合鴨同大蔥非常配合，一口大蔥，一口鴨，食落唔會非常油膩。食串燒真係唔係泰國餐廳既專利。另外我同朋友嗌咗一杯青檸梳打同荔枝梳打。夏天飲就非常啱嘞，青檸仲有好多片，非常新鮮，而且份量亦都好大杯，唔會好多冰。個青檸梳打仲好味過某啲泰國餐廳添。最後兩人埋單400蚊，喺銅鑼灣呢個價錢同埋有咁嘅環境食日本餐算係抵食。