易記冰室 (已結業)

同朋友返黎香港，帶左佢地同外國朋友遊佐敦同廟街經過左呢間冰室。第一感覺係好靚，有懷舊FEEL，但唔係咁岩行過呢條街我都唔知有間隱世茶記！岩哂我介紹香港美食畀外國朋友！所以二話不說就入左去喇。入到去等左一陣佢地畀左中文同英文MENU黎，服務都真夠細心。加上果日好多人要搭台，搵到位攝我地就拿拿臨坐低喇。叫左幾樣野SHARE，值得推介第一款係流心西多士，中意果種蛋黃香味，好似食緊奶黃月餅咁。第二款值得一試既係佢地既咖喱牛腩飯！本身無咩期望，但係佢唔同普通茶餐廳既咖喱架，唔知點形容，應該係加左D香料，牛腩好腍，有畀牛根又有軟腍腍既牛腩肉，加上辣辣地同濃郁既牛腩汁，又唔油，我真心推薦！另外臨走前返左去多食左兩次，因為咩？掛住佢個牛腩囉！朋友仲大讚夠大碟又低食。依家番左外國諗返起都想食......唯有上黎寫個食評。