Dodam Chicken (1亞太中心) (已結業)

之前去過銅鑼灣分店覺得幾好食，知道觀塘有一間，貪佢喺呢個區又唔使行好耐先到，仲有冷氣舒舒服服坐低。韓國嘢就係耐唔耐都會去食一次嘅，今次我哋嗌咗：招牌甜辣芝士無骨烤雞($205): 好鍾意呢度有烤雞同埋炸雞選擇，有時炸粉太厚嘅話會完全唔覺得自己食緊炸雞，烤雞又健康啲而且呢度煮得好入味。除咗有主角烤雞之外，仲有泡菜，年糕，同埋芝士獅子狗，而且呢度嘅芝士絕對唔會吝嗇， 上枱時鐵板夠熱令到芝士有拉絲效果。自己唔係好食得辣，覺得呢個甜辣到啱啱好，惹味之選。芝士雞蛋卷($135): 雞蛋卷，雖然材料簡單，但係都係我每次去韓國餐廳必選。唔知點解喺屋企就係煮唔到呢種味，同樣芝士一次出嚟就即刻好似熔岩咁樣流出，好邪惡。今日同我食下午茶，如果唔係都想嗌埋其他薄餅試吓，最特別之處就係呢度有一個自助甜品區，可以自己整格仔餅同埋有麵包布甸選擇，咁樣fusion又幾好玩，隔離枱自己整左個格仔餅都似模似樣。總結：韓國嘢其實唔會差得去邊，自己好鍾意呢度嘅招牌甜辣芝士無骨烤雞，呢個選擇真係減肥人士嘅一大喜訊。