千賀水產 (已結業)

今晚難得入元朗探朋友，朋友再帶我去呢間千賀水產試磯燒放題，朋友話呢間餐廳近期好受歡迎，非繁忙時段都要排隊，所以佢預先book定位。我地食9點個轉，8點9去到，已經見到好多人等緊入座。我地星期三晚食，9點後入座$218加10%，呢個價錢食磯燒海鮮放題真係幾抵 ！野飲方面，大路嘅汽水、水果味特飲、韓國汽水同茶，選擇都幾多。原來呢度仲係任飲Somersby Apple Cider架！正呀！食物方面，放題有嘅魚生、壽司、燒物、炸野、鍋物、熟食等等，種類頗多，質素亦唔錯呀！重頭戲係海鮮磯燒放題，每人2隻大蝦，大大隻，每邊燒2分半鐘剛剛熟，蝦肉爽口彈牙；蟹蓋入面嘅蟹膏濃郁鮮味，連蛋黃食口感更順滑；珍珠扇貝厚肉鮮甜，仲有海蜆都非常鮮美。餐廳非常貼心，點餐紙詳細教你點燒，唔怕唔知燒幾耐先至最好食啦，店員仲會留意你燒得掂唔掂，唔掂仲會過黎幫手。朋友果然好介紹，仲請埋我地食，呢餐好滿意👍🏻