船長意法日餐廳 (已結業)

入開嚟元朗，梗係要搵啲好嘢食啦。有人話想打邊爐，有人話想食爐端燒，爭咩啊，溝埋一齊食船長餐廳嘅火鍋放題咪得囉。120分鐘任飲任食嘅火鍋放題加爐端燒，有豬牛雞任君選擇，啤酒汽水任飲，雪糕任食，2位以上仲送一客海陸空磯燒拼盤，而且價錢都算合理。我哋最後揀咗HK$198美國肥牛。餐廳環境簡潔企理，闊落光猛，冇乜間隔，適合三五知己或者一大班朋友歡聚。醬料齊全，可以自由配搭前菜有中華沙律、螺肉等，仲有西瓜，菠蘿，可惜最後因為食到太飽，冇攞啲菠蘿去燒嚟食。隔離就係飲品同甜食雪糕櫃，款式都多，除咗HAAGEN-DAZS之外仲有雀巢同韓國牌子。有隻蜜瓜味嘅雪條真心正，好香蜜瓜味，軟綿綿嘅口感，如果唔係飽得滯真係想食多條。打邊爐嘅丸類種類都好多，燒嚟食都毫無違和感蔬菜組別都唔輸蝕，各種瓜菜菇類，麵同烏冬夠飽肚。海陸空磯燒拼盤有蝦，蠔，鮑魚，蜆，脆肉鯇。蝦好新鮮，無論打邊爐定燒嚟食都咁正。我哋最後都係揀燒嚟食。點少得豬牛雞串燒到主角美國肥牛啦，每碟四小塊，無限refill唔浪費。牛肉切到好薄身，肥瘦適中，淥兩淥就食得，沾埋自己調製嘅醬汁，食到唔停口。咁嘅價錢食到咁嘅質素嘅火鍋放題加爐端燒，真心係值回票價。