亞萊泰 (淘大商場3期) (已結業)

喺九龍灣搵嘢食，見到呢間阿萊泰，裝修都幾光猛，坐得幾舒服，就揀咗呢間。我哋叫咗個二人餐只係需要$298就有一個湯， 一個小食拼盤，一個主菜，一個炒菜，我地仲加左一個菠蘿炒飯，只係需要$50, 總共$350 唔洗就有咁多野食，十分抵食湯方面我哋叫咗冬陰功湯，佢個冬陰功湯辣得好野味，好足料有好多菇，啱曬鍾意菇嘅朋友，佢入面仲有一隻大頭蝦添。前菜有一個泰國小食拼盤，有蝦餅，貢丸，春卷，好多唔同種類嘅小食，個蝦餅尤其出色十分爽口，蝦味十足。主菜我哋叫咗咖哩海鮮包，係一個18吋長嘅法國包，入面裝咗啲咖哩同埋海鮮，我食咗五分之一舊已經飽咗，其他都係我老公去包底， 呢個單叫都只係120蚊左右超級抵食，一班朋友黎點呢個就啱曬。因為佢冇曬通菜，所以就揀咗芥蘭，本身驚會好老點知出到嚟係出奇地嫩，我地簡左用馬拉盞炒芥蘭， 佢唔算好辣，但係十分惹味，我差唔多一個人都食咗大半碟，值得推介。原本驚唔夠食仲加咗50蚊叫咗一個菠蘿炒飯， 兩個人最尾係食唔曬， 不過個菠蘿炒飯都好夠鑊氣，甜得嚟都幾好食，啲魷魚仔仲好爽口添。