吉壽日本料理 (已結業)

為左同我去左外國讀書翻左黎既friend接風洗塵，食放題走吾甩嫁喇。聽人講吉壽幾好食，就試一試啦！一入到去間餐廳，同朋友仔坐低，覺得幾舒服咼，張枱同座位幾寬敞，配合埋吾錯既裝修同燈光都幾舒適呀~至於食物既質素都唔錯。魚生，壽司，牛肉煲，炸物，串燒等等，要咩有咩，重要新鮮即整！ 我最鐘意食既係吉壽既炸物，特別係炸廣島蠔！起初唸住叫一兩隻試下先，點知一食就愛上佢！佢既炸物全部係新鮮即炸，所以一送過黎就係熱辣辣，當我將炸蠔放落咀嚼既時候，好似爆出黎甘, 溶在口中。其實比起出面其他既放題店都未必做到。食食下，望下周圍，見到出面有個位，有啲人堆係個到，就出去行下睇下有咩特別。點知原來重有小食，例如芝麻八爪魚，薯格，螺仔，例湯等等！而且過隔離小小，有一個大雪櫃，就好似便利店既雪櫃甘，野飲應有盡有，茶都有兩款，有忌廉鮮奶，有汽水，有果汁等，點飲都吾悶，好爽呀!! 食飽左又可以係隔離個甜品位，拎下馬卡龍，朱古力蛋糕仔，又可以自製乳酪雪糕。最後埋單既時候每人大約二百五十蚊以內，其實抵呀。