番本日式放題 (已結業)

放工同同事黎食個放題輕鬆下，奬勵下自己！肚餓到就暈低，飲返碗人參雞湯曖暖胃先。雞湯幾清甜，滲出淡淡人參味，最重要係夠熱！再黎個熱食！清酒煮蜆幾鮮甜，蜆係新鮮既，依樣好重要，海鮮依d如果唔新鮮你點煮都冇用，加少少清酒同鹽已經好完美！放題都有酸辣麵食！依個麵夠辣，我好鍾意！放題就係想樣樣試， 唔想食一樣野食得咁飽， 依個麵份量就岩岩好喇，又有得試，又唔會撐到飽哂。再加個牛油蒜香炒帶子，帶子細細粒但都幾肥厚而彈牙，每粉帶子都充分被牛油同蒜頭包裹著，正！鹽燒雞中翼燒至外皮乾身焦脆，一咬開仲有雞汁流出，我自己一個食左3隻！呢度仲有個賣點係有得食日式蒸氣火鍋！鍋嘅造型好有趣，最底係粥底，上層係一塊有孔嘅鐵板，蓋係草繩尖蓋。玩法係將新鮮嘅食材放上鐵板上蒸，蒸嘅時候食材嘅汁由鐵板的孔滴落粥底。先食鐵板上食材，最尾食個充滿各種食材精華嘅粥底，正呀！選擇算多，基本野有曬，仲有蒸氣火鍋食，埋單每位$208+10%，都會抵食。