京饌 (已結業)

由於太耐無食過北京鴨，近近地就選擇去京饌食，因為訂左位，唔使等。入到去坐定定三個人叫隻全鴨同四份套餐。埋單每大約3百幾HKD，整體餐廳環境唔錯，好有中國特色。食物方面大致上都幾好，先講隻片皮鴨，肉片切得薄，皮下脂肪比較少，除左有薄皮包住鴨肉片、青瓜同蔥之外，估唔到仲有山楂條，食落味道比較多元化。四人餐先黎小食，一碟黑豚肉，用蒜蓉爆香，食落彈牙骨又脆，味道夠之餘唔會太咸，跟住食碟手拍青瓜，睇落無特別但食落原來加左芥茉，清清地幾開胃。再黎個家鄉燻魚，一塊塊容易入口骨又唔多，簡單既燻魚鮮味好夠。　小食之後上了個湯，內有瑤柱蟹肉青豆。跟手上埋個粉絲煲，原隻蟹，蟹鉗多肉，但個粉絲比較乾身，食落麻麻地。然後上埋個風沙骨同魚湯上海莧菜，風沙骨食落覺得廚師真係重手得濟，味道好咸，而個莧菜幾清，料夠足加左杞子，菜夠爽，非常香口。　又菜又肉之後上埋餃子四粒，無特別... 套餐唔少得仲有糖水楊枝甘露，有小小失望咁，煮得稀左小小而且好甜，裡頭有士多啤梨粒，怪怪地。總括講返，食物味道中規中舉，份量足夠，都幾北京特色，主要岩一家或者一大班朋友食。