金滿閣茶餐廳 (已結業)

師傅都有好一段時間冇黎呢間食店, 點解呢? 師傅真係不得而知, 但既然咁耐冇黎加上都幾夜未食飯, 所以就黎呢度食番餐啦!時間都唔算早, 入到去竟然高朋滿座, 不過一條友點都好易搵位; 一坐底就即刻柯打左碟黑椒雞扒煎蛋飯, 再加杯凍檸茶! 等左一陣餐湯先上, 係中湯, 味道清清甜甜, 冇味精, 唔錯; 而黑椒雞扒煎蛋飯就有雞扒一塊, 煎蛋兩隻, 煎蛋煎得好靚, 蛋黃冇穿, 幾好; 而雞扒就煎得好香, 皮脆肉滑, 加上肉身好鬆, 幾好味; 而黑椒汁就夠香夠辣, 送飯真係一流; 至於凍檸茶就不過不失, 可以啦!總括黎講食物質素唔錯, 水準依舊, 環境一般, 服務都係普普通通, 價錢就唔貴, 連埋凍飲埋單三十, 絕對食抵食之選; 冇黎一排除左人面全非之外, 水準質素依然, 絕對值得厲黎, 笑臉當然值得一比啦!