丸十日本食堂 (已結業)

平日晏晝兩點半去食下午茶，唔使等位，即刻有得入去坐。侍應安排左我哋坐窗口卡位，位置寬敞。三個人叫咗每人一個下午茶set，有麵豉湯同主菜。另外加咗幾個小食。我叫咗海膽吞拿魚丼，賣相十分好，味道方面，海膽鮮甜，一啲都唔苦同腥，吞拿魚茸有蔥辟味，都唔覺得腥。份量睇落唔多，但食起嚟就知道啱啱好，有七八成飽。性價比高，74 hkd 就食到靚嘅海膽同吞拿魚。小食方面，叫咗章魚小丸子，炸廣島蠔，枝豆。章魚小丸子普通，粉漿比較多，而且冇木魚絲，但係夠熱，過得去。廣島蠔有驚喜，飽滿鮮甜，脆漿啱啱好，炸到金黃色，香脆可口。枝豆上菜嘅時候熱辣辣，食落鹹香，好好味。小食加錢就可以叫到，性價比高。最後叫咗甜品，Brownies 雪糕同小丸子雪糕，賣相同味道都普通。Brownies質感唔鬆，又唔夠香，雪糕只有朱古力醬味，食落似食雪葩，唔太creamy。以50幾蚊來計，性價比低，唔抵食。