Aurora Fusion Restaurant (已結業)

疫情下開新餐廳一啲都唔容易，位於尖沙咀亞士厘道嘅Aurora Fusion Restaurant，主打多國菜，店名就係為左尋求希望同曙光，都相當有意思。餐廳將西、日菜式打造新派fusion菜，款式好多，沙律、各式小食、主菜等等包羅萬有。餐廳面積寬敞，內裡裝修得頗有格調，配合昏黃柔和嘅燈光，氣氛悠閒。限聚令底下，只能夠兩人一台，唯有兩個人一齊出去食飯，所以叫嘅嘢唔算太多。德國腸拼盤：德國腸拼盤有5條腸，分別有慕尼黑白腸、芝士腸、香草肉腸、辣肉腸，同埋原味紐倫堡肉腸，腸仔整體來講唔算太鹹，當中香草肉腸最好味，而辣肉腸就最惹味。除左腸仔之外，仲有酸瓜同酸菜，唯一美中不足嘅就係冇沙律菜，配埋嘅話，中和腸仔嘅油膩感，咁就完美喇！燴蕃茄雜菜麵意粉：呢味帶香濃蕃茄味嘅意粉，非常足料，有好多蘑菇，絕對適合素食人士，上菜嘅時候，店員仲會問客人需唔需要刨上芝士，真係啱晒芝士腔。油浸王雞配普羅旺斯燴菜：燒雞賣相相當吸睛，雞肉係烹調期間將油份逼出，肉質相當豐富，入口非常香滑，配菜仲有薯仔、西蘭花同埋燴菜。抗疫係長久戰，唔食飽又邊度有力打仗呢？遲啲限聚令放寬後，一定要約多啲朋友嚟試多d菜式呀！