達順辣蟹火鍋 (已易手) 新餐廳

呢排邊爐癮起，咁啱同事推介老銅駱克道嘅達順辣蟹火鍋，就決定同朋友試一試！餐廳環境都幾寬敞，溫度適中，打邊爐都唔怕出汗。除左有大電視，餐廳亦提供wi-fi，非常方便。餐廳有好多種嘅湯底選擇，花多眼亂，但我地一致決定食粥底火鍋，有得食海鮮之餘仲可以集所有精華去煮粥，都只係198一位！首先上嘅係海鮮，除左肉蟹同沙白，另外仲有五款自選，我地就揀左鮑魚、蝦、大尾魷、油貝同埋花甲，份量超級大碟！款款都好鮮甜，唔駛點豉油已經好好食。最推介係肉蟹，啖啖肉又非常鮮，大家掛住食都唔記得影相！食完海鲜就到第二round自選配料，總共可以揀八款。識食一定要食肥牛同雞，肥牛比例均勻，口感一流、雞件又嫩又多汁。最後一round就係重頭戲海鮮粥。店員先清理好鍋入面嘅食物，調整好湯嘅份量後，然後加粥，煮一陣再加芫茜、冬菜、菜甫粒、大頭菜粒同埋豬油渣粒提味。值得一讚係，店員加之前有主動問各位有無邊一樣唔食，非常貼心。嘢飲方面我地揀左粟米汁，口感creamy非常足料，可以一試。