林記小食

營業中

休息中

好耐都冇嚟差館里呢邊,以前放學日日都經過,嘻嘻哈哈又一日,附近都係街坊店舖,有一次落好大雨唔知醒,走入去麵包舖借電話打比阿媽請半日假。轉眼又過咗好多年,麵包舖當然不再存在,熟悉嘅舖頭亦唔多,林記小食雖然好似係紅磡小食比較出名嘅其中一間,但喺那些年嘅差館里佢都應該未搬入舖。入咗幾耐唔係問題,重點係啲嘢食得唔得先?今次叫咗魚蛋同腸粉。魚蛋就當然係食辣嘅,佢唔係軟淋淋嗰種,係有咬口得嚟又唔會死實實而,而佢嘅辣味唔會只係表面,而係有少少入味,喜愛咖哩魚蛋嘅朋友可以試吓。至於腸粉,其實可能大家都同意,街邊食腸粉其實係食個醬,啲腸粉只要唔好爛晒或太軟身,基本上都可以接受。林記去腸粉去得咁快,唔會有呢個問題。咁佢啲腸粉又有冇因為去得快而賣啲唔夠熱比你呢?咁又冇喎。我見佢會喺後面攞上嚟補貨,佢後面應該有慶住,一冇就喺後面攞。講咗咁耐,究竟佢啲醬得唔得先?答案係可以。麻醬如果濃啲,會更好。滑就一定,夠豬油就得。甜醬唔會死甜而且佢都唔姑寒,醬比得夠!呢幾年都好少去紅磡,希望下次再嚟都仲有機會幫襯啦。