汀角灣燒烤農莊

營業中

休息中

就咁...話說早期無記有個飲食節目介紹左一個燒烤場，主要任食串燒既...其中我被那燒香蕉所吸引，於是乎捉左老公同佢好兄弟入嚟大埔開餐。到埗後先到入口處/小食亭買飛，然後入內自己揾位坐，工作人員會跟住幫忙set 爐，而客人可到剛才既小食亭用飛換一罐飲品(per head)及攞一人一份既海鮮(每人一隻蝦﹑一枱一煲蜆)生果(一人一件菠蘿﹑及我特登入嚟食既燒香蕉~兩人一隻)。環顧四周，點解冇涼亭或園林物體既呢？明明喺電視見倒燒烤場景觀唔錯，但呢度完全係兩回事，喺馬路邊入少少冇景可言... 即上Openrice望下，發覺自己去錯地方...不過橫豎錢已俾，唯有好好享受呢次燒烤樂啦！食物種類唔算多，都係大路既牛扒﹑雞翼﹑豬扒﹑粟米﹑魷魚﹑腸仔﹑紅腸﹑雜丸﹑雞腎﹑冬菇﹑青椒﹑蒜頭﹑葱﹑蕃茄﹑蒜蓉包﹑原隻茄子﹑串燒肉類等等，味道大致上一般，冇話特別好味，反而想講下一人一份嗰啲食物。燒菠蘿個樣唔錯架，不過我唔食既，老公話麻麻。蝦冇乜特別。煲蜆就相當唔錯，有鮮味，且鮮甜，只係間中有一兩隻帶砂。最正係燒香蕉，不過要有耐性，否則唔夠腍冇咁好味。人家既燒香蕉更可急凍再加朱古力醬作甜品，我下次一定要去啱地方再吃過。