鴨仔冰室 (已結業)

自從限聚令之後，好耐都未試過出去鋸扒。難得今日男朋友有時間抽出嚟，可以喺公司附近食個西餐。呢間鴨仔冰室開咗喺鴻圖中心入邊，呢度出名多餐廳㗎啦，當中有呢間幾有特色嘅西餐廳。而其中我覺得好難得嘅係餐廳嘅老闆好Nice好好人，仲要超級有禮貌添，呢個你係喺工業區估唔到嘅服務。佢行嘅係懷舊風，格仔枱布，啡皮梳化嘅卡位，再加埋留聲機，感覺幾有情調㗎。我哋兩個都嗌左佢哋嘅特色鐵板餐嚟試吓。每個餐都會跟咗個沙律或者湯，佢哋今日嘅是日餐湯係黑松露薯蓉湯，佢個薯蓉打到好滑，飲落去甜甜地，幾唔錯。我自己就嗌咗個大蝦牛柳餐，佢隻蝦落咗蒜蓉去焗，真係好香好好味。而佢個牛柳可能因為唔記得同佢講要幾成熟，所以佢上咗全熟，不過好彩都唔會太乾。而男朋友就嗌左個西冷牛扒餐加煎鵝肝，佢個鵝肝都唔錯，唔會煎到燶晒或者油林林。值得一讚嘅係佢哋啲薯條，超級大條，入邊係滿滿嘅薯蓉，外脆內軟，好好味。另外我哋都試咗佢個薯蓉，佢個薯蓉都有落奶去打嘅，感覺好creamy，甜甜地，唔錯。