鐵板超 (已搬遷) 新店位置

今日係我哋嘅週年紀念日，男朋友一早訂咗呢一間鐵板超，本來以為只係普通一間日式鐵板燒，最多都可能係嘢食新鮮啲，同埋好食啲，但係原來呢度嘅服務態度真係幾好，令到我都要上嚟出一出文呀👍👍👍嘢食新鮮就不在話下，今日就算係星期六呢度都有66折優惠，不過就只限午市。男朋友一早揀定個餐，我哋叫咗呢度嘅龍蝦鮑魚餐，首先係前菜，呢度嘅前菜有三樣，分別係沙律，芥末八爪魚，同埋魚乾仔。 跟住就到咗重點嘅鮑魚啦，鮑魚好新鮮，係新鮮到佢喺你面前喐，我係咁用筷子嚟篤佢，佢就係咁喐😂😂😂 另外呢度嘅龍蝦都唔少嘢，隻蝦好大隻呀，同隻手掌差唔多大，蝦肉都好爽甜。另外個餐都有包到聖子皇，和牛，炒飯等等，大家可以喺張圖度睇到，真係好吸引㗎。啦啦啦，到咗呢度重點嘅慶祝環節，師傅有問定我哋有冇節日慶祝，我男朋友講咗今日係週年紀念，師父就用佢神乎其技嘅技術，我諗係用咗麵粉，畫咗個公仔，個公仔係我最鍾意嘅，角落生物呀，再用週年紀念日嘅字眼包圍住隻公仔，真係幾好睇同埋感動下😍不過我唔記得影相呀，諗落真係有啲傷心，但係真係讚一讚師傅，同埋我男朋友揀咗呢間餐廳。