一鍋豐 (已結業)

今日同屋企人黎試一鍋豐，一早就book好左位，所以去到就可以入座啦！地方都幾闊落，坐得好舒服。野飲、甜品、鼓油都係自己拎，選擇都算ok多，不過不失。湯底揀左清湯羅白牛腩鍋同麻辣鍋，麻辣鍋湯底一啲都唔辣，有小小失望。反而牛腩鍋就幾濃牛味，好有驚喜。鮮滑牛肉。牛肉都幾大片，都幾新鮮。食落好似牛扒咁，肉質好嫩，牛味都算濃郁，質素都可以。手切肥牛。肥牛切得有d碎，食落油脂比較豐富。同鮮滑牛肉比起，較為有咬口，但就小左啲牛味。花膠。近排愈黎愈多火鍋店有花膠食，但大多數都係花膠仔。但e到嘅花膠係大大片架，入口係濃濃嘅魚膠味，都幾黏，比相像中好。脆肉鯇魚片。打邊爐必備嘅係脆肉鯇魚片，e到嘅魚片切得比較厚身，剝完之後卷埋一舊。食落係爽口嘅，但就有小小泥味。蔬菜。冬瓜、蘿蔔都係一開煲就掉落去，食到一半就可以食啦。冬瓜清甜，蘿蔔都無渣，幾好味。娃娃菜索曬湯底嘅味，好好食。食物就不過不失，但全程侍應嘅服務態度好好，見我地食蝦剝完殻係碟到，好快咁幫我地換新碟。上菜同收空碟都好快速度，好好嘅服務。