Fûhn (The L. Square) (已結業)

銅鑼灣呢間越南菜新開，最鍾意試新嘢，咁先會為生活帶上驚喜！招牌、裝潢都好新穎，傾向年輕化。橙黃色調令成間餐廳感覺好精神，好有格調。先點咗個小食拼盤。炸蝦餅好正！好脆口，蝦肉夠晒彈牙！春卷皮薄餡靚，外面薄薄一片好脆，入面有蘿蔔絲，味道，口感都值得加分。至於牛油雞翼，好重牛油味，可惜比預期欠缺少少蒜味，加埋蒜香就一百分！除咗小食之外，仲嗌左碗特式牛湯河，湯河有分正常、大、加大size。叫咗個正常size都好大碗，份量十足。牛嘅款式都唔少，有生牛、牛肮腩、牛丸、牛筋、牛柏葉，每樣都有得試吓，唔怕寡。最鍾意食牛肮腩，腍身唔韌，好易入口。最後仲食咗個豬頸肉撈檬，豬頸肉薄身切成細件，燒過好香脆。加入酸醋好開胃。另外一提，河粉同檬粉都好好味，幼身，腍與彈牙之間，口感唔錯。飲咗杯香蕉奶昔同檸梳打，兩杯都好飲。青檸梳打甜酸度適中，比例均勻。香蕉奶昔好fresh，香蕉味好新鮮，味道唔太濃，好清新，口感亦唔杰，唔會覺得滯。