Jazz Bird (已結業)

做完運動行過附近，心血來潮突然想食餐素，聽聞而家啲素食已經做到好出神入化，又咁啱附近真係搵到呢間Jazz Bird，決定入去試吓。入到去餐廳環境唔大，但係感覺到員工之間關係好溫馨密切，上網了解吓先知原來係一間社企餐廳，係由義工團隊所組成嘅抗疫小組，定期會向街坊提供低碳食物，收益亦都會用作慈善用途，咁充滿愛心嘅小店，未食都已經覺得無揀錯👍🏻💯望望餐牌好多都係生酮、低碳、健康嘅食物，今次就揀咗款蟹餅沙律同埋黑松露意粉🍝菜式送到上枱，賣相夠晒精緻，差少少唔記得自己係叫緊素食。沙律上蟹餅有兩塊，外酥脆內軟滑，唔知係用咗啲咩材料，竟然可以整到一絲絲蟹肉咁嘅口感，調味得宜👍🏻沙律醬汁好開胃，酸酸甜甜夠清新！完全唔細份，食完都半飽～而意粉方面，黑松露夠曬濃，十分惹味，仲好creamy，正如圖片所見每條麵都沾滿醬汁，軟硬度剛好但又唔會太膩，差啲唔食曬🤣🤣😋