斗斗 (已結業)

自從限聚令，都已好少出街堂食，今日同朋友因為出開觀塘買野，行到攰又見肚餓，經過一間斗斗小食店，門口已經好有特色，以香港懷舊裝飾佈置，除左有港式小食，仲有珍珠鮮奶同水果茶飲。不過最吸引既係，原來裡面仲有間食台式小食既，尤其呢排仲要無得去台灣旅行，結果都忍唔住坐低食番餐台式野解下饞。我同朋友各自點左2款，一款怪味雞同埋香辣牛筋腩擔擔麵，因為本身唔太鍾意飲芭樂汁，所以叫左小食店個水果茶飲，水果茶都幾好飲，不過我唔記得叫少甜，個人偏好唔太甜既飲品。怪味雞好惹味，雞既面頭鋪上滿滿既蔥蒜，帶上甜甜酸酸既醋味，非常開胃，將蔥蒜加上米粉度食，就更加好食，值得一讚既係，店員好細心，佢會另外俾隻骨碟放骨，咁就唔會搞到周檯都係雞骨。香辣牛筋腩擔擔麵，擔擔麵食落有口感，麵條唔會糊，亦唔會太硬，湯底帶有少少辣味，鍾意食辣既朋友會覺得味香麻辣，牛筋腩都入味夠鬆軟。不過都係屬於重口味既，鍾意食清淡既就未必岩食喇。價錢都真係幾抵食，下次都會帶埋朋友仔再黎食過，值得推薦。