Le Viet (已結業)

天氣仲係悶熱，總想食啲酸酸辣辣開胃食品。Le Viet 係我想食越南菜時嘅選擇。今日同老公分別點做個咖喱牛腩煲，香茅燒烏頭，同埋豬頸肉撈檬。非常之豐盛嘅一餐，原本想點燒木棉魚，但係冇貨，咁就轉我識開嘅烏頭啦。烏頭好大條，即叫即燒，食開都知要等得比較耐，但係咖喱牛腩煲就上得好快啦！佢個咖喱牛腩煲有好多薯仔，咖喱汁唔係太辣，但好惹味。個牛根仲做得幾腍，牛腩都有好多件。撈檬係我最鍾意食嘅越南菜，估唔到佢嘅豬頸肉份量有好多，食完晒啲檬仲有豬頸肉。食完晒再傾咗一陣計，條燒烏頭就到啦！一上枱好香嘅香茅同燒魚香味。烏頭連埋魚鱗一齊燒，更加可以保存魚裏便嘅油脂同肉汁。佢成個肚都釀滿咗香茅，頭尾燒得焦香。因為太大條，我哋仲打包左半條返屋企，晏咗啲涼食都好好食。