鳥棲日本料理 (已結業)

男朋友喺觀塘區有個Office，所以間唔中都會喺嗰邊食下野。今日想食下日本菜做晚餐，於是就試咗呢間朋友介紹嘅日式居酒屋。我哋當晚大概七點幾去到，成間居酒屋已經坐滿晒人。雖然店舖裝修講唔上非常漂亮，但絕對係坐得舒服，非常適合一班朋友去傾偈食飯。當晚我哋叫咗六樣食物，每一樣都覺得幾好食，冇一樣野係會令我哋失望嘅。芝士明太子蛋卷口感嫩滑，上面嘅明太子非常慷慨，夾埋濃郁嘅芝士實在味道非常豐富。牛油果蟹子沙律亦都做得唔錯，每樣配料份量恰當，結合起嚟非常美味。韓風牛舌非常入味，亦非常值得推介。鳥棲和牛係店員推介嘅一串串燒，生熟程度恰當，油香十足，店員嘅推介果然亦都冇錯。當晚眾多食物當中，我最喜歡嘅就係花魚一夜干。魚鮮味十足，份量亦不少，我認為係整個餐牌中性價比極高嘅一個菜。我哋最尾點嘅牛肉稻庭烏冬，亦非常之令人滿意。總括而言，呢度真係一個適合同三五知己一齊去食住野傾偈嘅好地方，真係值得推介。