辣度餐廳 (已結業)

有一次係Openrice搵食見到呢間火鍋小店，LUNCH時間居然有午市套餐，雖然款式唔多，不過食物吸引，決定星期六去試下。中午時間1點半前黎到，店內食客唔算多，但無諗到9款套餐中，有5款已經售罄…..😫本身已經唔算多選擇，而家更無選擇😥。結果同朋友都揀左香草雞扒，不過一個配即炒意粉，另一個配薯菜。午市套餐包餐湯，分別係西蘭花忌廉湯同水果南瓜湯前者好重西蘭花味，但完全無忌廉香，似係西蘭花蓉羮，唔好味。後者南瓜香甜，比較好味。香草雞扒配即炒意粉 $58意粉的確係即炒，有黑椒、洋蔥香，上枱果陣香噴噴!! 唔似坊間炒完放左好耐果D，意粉仍然彈牙，而且分量好多。雞扒唔單止大塊，仲好厚身，嫩滑又多汁。呢度既雞扒有別於其他餐廳既雞扒，多左一陣燒烤香味😌，似係煤爐燒多過煎。點埋個又蒜又酸既汁，別有一番風味。香草雞扒配薯角 $58薯角份量一D都唔少，分分鐘食完仲飽過食意粉!! 薯角係即炸，不過略嫌炸得唔夠脆口，但勝在重薯味。如果薯角可以另上會更好，因為雞扒太多汁，大部分薯角都點到D汁而變淋左。餐廳食物唔錯，而且幾大份，可惜太快無乜選擇，如果套餐供應時間長番少少就更好🤤。