韓日燒 (已結業)

有得韓燒有得打邊爐仲有新鮮壽司刺身身食，任飲任食兩小時都只係百多元，唔怪之得呢度咁受一家大細歡迎，因為選擇實在太多，實有一種岩你口味。呢度除左有啤酒清酒任飲之外，仲有比較少見既菊花酒，桂花酒同梅酒，梅酒唔會太甜，配燒肉好夾。熱清酒🍶亦好香，飲落好順喉。啤酒竟然有青島，超正！壽司刺身種類都好多，有三文魚，甜蝦，鮑片，都好新鮮，而且都見佢地係不斷推出。鐵板燒有燒牛肉燒帶子燒秋刀魚，有2位職員不斷咁燒不斷補給，職員都好好人會問你想食d咩。仲有好多熱食選擇，推薦炸雞，熱辣辣好好食。主角韓燒，燒烤材料種類非常多，牛仔骨，腸仔，雞翼，五花腩等等，比較少見仲有鴨胸，豬腸，火雞腎，連餃子都有！肉類醃得都好夠味，質素唔錯。燒烤爐面放張有油既牛油紙，燒到咁上下隨時可以自己換過張，我覺得呢個方法幾好，唔洗下下要職員幫手換爐面。打邊爐配菜都好多，放左係另一邊凍櫃，見d職員都不停整理d食材，感覺都好衛生。食材都新鮮同調好味，自己整火鍋無難道甜品選擇都好多，入面有個豆腐凍好好食，豆味重又夠滑，仲有布丁，雪糕任食，見d小朋友好開心不停食甜品。