峻嶺高爾夫球練習場及燒烤場 (已結業)

一開始聽到去BBQ真係耍手同擰頭，天氣咁熱會中暑架，重要去到天水圍咁遠，真係唔多想去，我住奧運架。但個死黨生日，指到明要BBQ，唯有硬住頭皮頂硬上喇 !入到去個環境又真係幾正喎，我地十幾個人5點多啲到，可能開揚都幾好風。而我地一行12人就book左架冷氣BBQ車，我最鐘意佢，因為我大部份時間坐係裡面打牌好舒服冷氣重好夠涼。講返啲食物先，因為唔想煩，所以我地點左2個6人餐，一個係海鲜餐，一個係普通餐，再散叫左幾種食物。食物個份量同種類都真係幾多，重點推介個一口牛、棒棒骨、蟹蓋、青魚同甜薯，佢個一口牛配岩鹽真係好正，而棒棒骨好入味，蟹蓋同青魚我都係第一次見BBQ場有呢種食物，又幾好食。仲有我最愛既蒜蓉燒茄子，好入味，但額外要蒜蓉就要俾多$2，都ok抵既。可惜既係無棉花糖同麵包，如果有多d選擇就好。最後埋單每人都係補多二十零蚊，個個都食得飽，性價比較唔錯，可一可再。