炯記餐室

營業中

休息中

長沙灣元洲商場附近都幾多野食，行左兩個圈都未諗到食咩，朋友最後決定食呢個又中又泰又越既炯記，印象中呢間野係食燒味多。入到去我真係諗住叫燒味，但呢間原來得叉燒五花腩，但唔緊要，我都鐘意，我無食飯，食左佢話自己好出名既鵝油撈麵。朋友揀左麵檔四寶飯，有豬手，牛腩，牛肚加手撕雞，幾得意。兩個男人再加左個雞腎，雞腳，木耳小食。小食裡面雞腎同雞腳都好食，雞腎好爽脆，味道又剛剛好。正！雞腳係泰式版，魚露酸辣味岩岩好，份量又多。木耳就同跟餐小食一樣，不過不失。叉燒鵝油撈麵。叉燒食落無睇落咁肥，咬落去肥度幾好，而個叉燒醬亦唔錯，唔會太甜，幾好胃口。鵝油撈麵就好香好正，可能我又加左蝦子，香味再度昇華，應該可以食多碟🤣四寶飯最好味係手撕雞，味道調教得好好，果然係店舖推薦，其他幾樣都唔錯，叫above average，但又唔叫好特別。總體黎講，性價比好高，而且環境又乾淨，下次可以再黎！