高麗軒韓國料理 (已結業)

琴日返工睇見朋友韓國旅行相，搞到我好想食韓燒！啲燒肥牛呀燒五花腩呀不斷呼喚我，我做野都冇mood 呀，即刻相約好姊妹，俾左幾間心水佢揀，佢揀左尖咀呢間，今晚有得狂砌啦！去到已經見到出邊有人排隊，好彩早到咋😌。佢個Menu都幾多嘢揀，有肉類海鮮、韓式鍋飯、湯、小食呀咁。餐前嘅泡菜小食，我最推佢嘅菠菜同醃青瓜，好甜好爽口,kimchi 可以再辣D就好。我最愛嘅黑毛豬❤原本$208任食但要加$38先食到佢(upgrade左個package) ,不過真係値嘅!呢個厚薄大小花紋都平均，煎食落口唔會太油膩，豬嘅肉味都幾出。加埋韓式豆瓣醬同,生蒜，用菜包住食仲正，有爽爽脆嘅口感！個rib eye 又係重點之一，啲肉嘅色澤不錯！薄切左，所以可以辣一辣就食得,好嫩無渣!燒牛舌係我朋友至愛，呢度入嘅牛舌都算新鮮，佢清左一碟，建議加少少鹽吊味。海鮮拼盤最驚喜佢個蝦，竟然燒完冇變梅,出面食任食好多蝦都係梅嘅。泡菜薄餅調味幾好，甜辣適中，又落左足料泡菜，如果佢可以煎到脆身會再好D。埋單都係$250左右，CP真心高，下次食睇下有冇得訂枱先。