元洲牛肉麵 (坑口村) (已結業)

男朋友最喜歡食牛肉，今晚就同佢食下牛肉麵，希望佢喜歡。店子環境光猛，整齊企理。木枱木櫈，有些台灣FEEL。牆上貼滿餐牌，好多選擇咁，有牛肉麵、飯類、小食、雞煲、套餐、串燒和飲品。男朋友第一時間一定叫牛肉麵，元州三寶牛肉麵($72)內有一件金錢展、兩件牛筋和兩片牛舌，大大碗，熱辣辣，香噴噴，好吸引! 藥膳湯底，色澤和味道都濃，少油少鹽，非常好飲，正! 麵條又滑又有咬口，口感唔錯，鍾意連湯一齊食，好味! 大大件牛筋不單止味道濃郁，而且好腍滑，好多膠質；厚切金錢展腍嫩兼存肉汁，牛味香濃，優質! 牛舌又大又厚身，同樣腍嫩，烹調入味，都好食! 男朋友同我對呢碗元州三寶牛肉麵都好滿意! 趁天氣凍凍地，最岩就食雞煲 ($128)。份量都好足，除咗有大量雞件外，還配了很多紫洋蔥和芫茜。每件雞都啖啖肉，弄得入味，味道鹹香帶辣，不錯！仲有索晒汁的紫洋蔥和芫茜，都好好味。小店真係多元化，又牛肉麵又雞煲，仲有串燒添! 叫咗四款，安格斯封門柳串 ($28)啖啖肉，雖乾了少少，但好入味，牛味都幾濃添! 燒翠玉瓜串 ($11) 保持翠綠，爽脆多汁，調味合宜，不失原有瓜味；燒娃娃菜串 ($11)爽嫩有汁，簡單而美味。