千の味刺身壽司專門店 (海福花園商場) (已結業)

天氣咁熱唔想煮飯，呢D天氣最啱就係食壽司，唔會越食越熱。樓下有間刺身壽司外賣專門店，咁就買返屋企食吓先。呢度都好多晚餐揀，仲送罐裝汽水。我就叫左三個餐，等嘅時候發現都有幾多外賣客人。店員都幾細心，將凍食同熱食分開入袋。凍食驚變壞，仲比埋舊冰客人。呢舊冰啫囉仲可循環再用，好環保。五色丼：刺身有三文魚、吞拿魚、赤蝦、油金魚同三文魚籽，件件均勻，size正常，刺身帶薄薄油脂，唔會乾爭爭。唔好睇少呢個丼，飯嘅份量都好多吓，估唔到呢個丼都幾高質。壽司餐：有三文魚兩件、油金魚、白身魚、赤蝦、吞拿魚、蟹籽，熟蝦、玉子同鰻魚。呢個餐幾好，款式夠多，有生有熟，滿足晒樣樣都想食嘅心理。除左魚類刺身好食，連熟嘅壽司都做得唔錯，即叫即整，夠晒新鮮。邊旁仲比埋隻碟要黎裝豉油同wasabi，真係very good。火灸三文魚：燒到好香，入口油慢慢滲出，好好食。燒鯖魚飯定食：除左主食，仲有蔬菜沙律同埋中華沙律，真係夠晒豐富。鯖魚旁邊仲預備埋檸檬同醬汁，魚燒得唔錯，加埋檸檬汁一齊食夠開胃清新。飲品：見到有教主代言飲品OOHA，簡直開心啦。荔枝乳酸味係我最愛，有氣夠凍無糖又解渴，識揀一定係佢。